எத்தனைக் காலம்தான் ஏமாற்றுவார்

பூமித் தோன்றிய நாள்முதலாய்            
          பொய்யும் புரட்டும் உலவுது
சாமியின் பேரால் சாமானியர்கள்
          சதியில் மாட்டித் தொலையுது
உழைக்கும் மக்கள் வாழ்க்கையிலே
         ஒருஅடி ஏற்றமும் முடியலே
கொழுக்கும் கொள்ளையர் வீட்டிலே
      கோடி கோடியாய் புரளுது

ஓட்டுக் கேட்டு வந்தவனெல்லாம்
           கோட்டைக் கொத்தள வாழ்விலே
வேட்டியும் இல்லைத் தொழிலாளருக்கு
           வெட்கம் கெட்ட நாட்டிலே
அடிப்படைக் கல்வி எல்லோருக்கும்
           அவசியம் என்பது தெரியலே
மடிக்கணினி ஏமாற்று நாடகம்
           மானங் கெட்ட நாட்டிலே

மகளிர் பயமின்றி நடமாட முடியல
          மகாத்மா பிறந்த மண்ணிலே
தகனம் செய்யவும் தனி சுடுகாடு
         தமிழ்த் தேசிய மண்ணிலே
காதலைப் போற்றும் காவியம் நூறு
        கழக இலக்கியம் முதலாக
ஆதலால் அனைவரும் காதலித்திட
         அனுமதி உண்டா? இல்லையே

எல்லாம் போலி வேடம் தானே
       ஏன் இன்னும் தெரியலே?
உள்ளம் முழுதும் மனுவின் ஆட்சி
        உயர்ந்த சாதி திமிராலே
கள்ளம் இல்லா ஏழைகள் இன்னும்
        கண்ணை மூடி இருப்பதா
எல்லாம் துணிந்து எதிர்ப்பீர்
      எத்தனை காலம்தான் ஏமாறுவீர்