புரட்சிக்கவி

பாவேந்தன் பாட்டென்றால் அனல்பறக்கும்
பழமூட வழக்கங்கள் அழிந்தொழியும்
கூவுகின்ற குயில்பாட்டும் புரட்சியாகும்
குத்தீட்டிக் கவிதைகள் குவிந்திருக்கும்

ஆரியத்தை அழித்தொழிக்க அடியெடுத்தார்
ஆட்சிமொழி தமிழாகத் தடியெடுத்தார்
ஓரிடத்தில் குட்டையெனத் தேங்காமல்
ஊருலகம் பாட்டாலே சென்றடைந்தார்
யாரிடத்தில் உரைத்தாலும் அவர்பாட்டை
ஊறிவரும் உணர்வுவீச்சு கண்டிருப்பீர்
சூரியனாய் சுட்டெரிப்பார் கொடுவழக்கம்
சுத்ததமிழ் வீரர்பா வேந்தர்தான்

தமிழுக்கு எதிராக எவரேனும்
தம்கருத்தை வெளியிட்டால் கொதித்தெழுந்து
துமிக்கியென வெடித்திடுவார்; பாவேந்தர்
தூள்தூளாய் ஆக்கிடுவார் தமிழ்பகையை
இமியளவும் ஈரமிலா நெஞ்சத்தாரை
இழுத்துவந்து தெருவினிலேப் போட்டுதைப்பார்
தமிழ்த்தெருவில் தமிழ்க்கடையில் பெயர்ப்பலகை
தமிழிலேயே வைத்துவிட ஆனையிட்டார்

பொதுவுடைமை பகுத்தறிவுப் போர்வாளாய்
புதுவுலகம் படைக்கின்றப் புரட்சியாளன்
வதுவையர் உயர்த்துகின்ற காவியங்கள்
வழங்கியவன் வணங்காத பாட்டுவேந்தன்
முதுதமிழை மூச்சாகப் போற்றியவன்
மூடராக இருந்தவரை மாற்றியவன்
எதுவரினும் தன்கருத்தை நிறுவியவன்
ஏற்றமிகு கவிச்சித்தன் பாவேந்தன்