காதல் துளிப்பா

மல்லிகை மணம்
அறையெங்கும்
மாற்றலானப் பெண் ஊழியர்

வருகையின் விளம்பரம்
வருடும் இசையொலி
கொலுசு

வளைவுகளில்முந்தாதீர்
எச்சரித்தும் முந்தியது
முந்தானை

வேகத் தடை
விழுந்து எழுந்து விரல்கள்
இடுப்பு மடிப்புகள்

நிலவு முகத்தில்
மின்னிய விண்மீன்
மூக்குத்தி

காதுகளில்
முழுநிலவு
வளையம்

காமராசர்

விருது நகரில் பிறந்தவராம்
விடுதலைக்காக உழைத்தவராம்
உருவில் கருமை நிறத்தவராம்
உண்மையில் வெள்ளை மனத்தவராம்

நெடியத் தோற்றம் கொண்டவராம்
நேர்படப் பேசும் குணத்தவராம்
கொடிய அறியாமை இருளகற்ற
கொள்கை வகுத்து உழைத்தவராம்

மதிய உணவு அளித்தவராம்
மாணவர் கற்றிட அழைத்தவராம்
புதிய அறிவு வெளிச்சத்தை
புகுத்தி தமிழகம் காத்தவராம்

ஐந்தாண்டுத் திட்டங்கள் கண்டவராம்
அணைகள் கட்டி முடித்தவராம்
பைந்தமிழ் நாட்டை பசுமையாக்க
பாடுகள் பட்டே உழைத்தவராம்

பகுத்தறிவுப் பகலவன் பெரியாரால்
பச்சைத் தமிழரெனப் பட்டவராம்
வகுத்தப் பாதையில் வழுவாமல்
வாழ்ந்து காட்டிய காமராசர்