பாலா கவிதைகள்

இருட்டைக் கிழித்தெறி

2012-01-24T10:21:00.000-08:00

ஆயிரமாயிரம் கோடியில் ஊழல்கள் அரங்கேறும் தேசமடா
அன்றாடங்காச்சிகள் அநியாயமாய் சாகும் அற்புத தேசமாடா
கோயிலும் கோபுரமும் கோடிக்கோடியாக வான்தொட்டு நிற்குமடா
பாயின்றி படுக்க இடமின்றி குறட்டிலே பறிதவிக்கும் மக்களடா

மட்டை விளையாட்டு மடையர்கள் ஆட்டத்தில் மயங்கிடும் இளைஞரடா
மானத்தை மண்ணை மதிக்காத நிலையிலே வாழ்ந்திடும் யுவதியடா
பட்டை பட்டையாக சாம்பலைப் பூசியே ஏச்சிடும் (போலி) சாமியடா
பண்பாட்டை மொழியை பாதுகாக்காத பச்சைத் துரோகமடா

அயல்நாட்டு வங்கியில் அன்னைதேசப் பணம் அடைக்கல மானதடா
அம்பானி டாட்டாக்கள் ஆட்டும் விரல்திசை அரசாங்கம் ஆடுதடா
கயல்தேடும் மீனவர் கட்டுமரங்களும் கடற்கொள்ளை ஆகுதடா
கன்னித் தமிழீழம் வல்லரசுக் கயமையால் கடல்நீரில் மூழ்குதடா

பன்னாட்டு நிறுவனப் படையெடுப்பால் தேசம் பாழ்பட்டு போகுமடா
பச்சத் தண்ணீருமவர் வைச்ச விலையென்னும் பயங்கரம் நிகழுமடா
தென்னாடு வடநாடு தீராத பகையாலே இந்நாடு உடையுமடா
தெளிவில்லா கொளகையால் தெருவினில் நம்மன்னை பாருமடா

காசுக்குக் கல்வியைக் கடைச்சரக்காக்கிய கணவான்கள் தேசமடா
காமராசுக் கட்சி ஆட்சியில் இருந்தாலும் கல்விக்கண் மூடுதடா
ஆசியாக் கண்டத்தை அபகரித்திடவே அன்றாடம் எண்ணுதடா
அசிங்கமில்லாமலே வறுமையை தேசிய அவமானம் என்குதடா

நூறுகோடி மக்கள் வீறு இருந்தாலும் நூல்பண்டம் ஆனதடா
நுகத்தடிப் பூட்டிய மாடாக உலகவங்கி சாட்டைக்கு ஓடுதடா
ஆறு அணையெல்லாம் அவரவர் உரிமையென அடங்கிக் கிடக்குதடா
ஆனாலும் ஒருகுடை அரசாட்சி கனவிலே அன்றாடம் விழிக்குதடா

அறுவடை செய்திட்ட தானியமெல்லாம் அறைக்குள்ளே முடங்குதடா
அன்றாடம் கஞ்சிக்கு அன்னையின் பிள்ளைகள் அலைந்து திரியுதடா
தெருவெல்லாம் ஒளிவெள்ளம் இரவைப் பகலாக்கி நகரங்கள் வாழுதடா
தெளிவில்லா மடமையில் பகலும் இருட்டாகி கிராமங்கள் சாகுதடா

அணிசேரு தோழரே அனைவரும் கைகோர்த்து அன்னை தேசம் காப்போம்
அநியாய பேர்வழி அதிகார கூட்டத்தை அடியோடு தான் சாய்ப்போம்
இனிவேண்டாம் தாமதம் இப்போதே சேருவீர் இருட்டைக் கிழித்தெறிவோம்
இனமான உணர்வோடு எழுச்சியாய் யாவரும் இம்மண்ணைக் காத்திடுவோம்

பெயர்ப் பலகைத் தமிழாக்கு

2012-01-20T10:15:00.000-08:00

விழியை உறுப்பென்று விளம்புகின்ற வீணரென
மொழியைக் கருவியென்று மொழிந்திடுவார் அறிஞர்சிலர்

கருவியென்றால் செயல்முடிக்கும் திடப்பொருளா தாய்மொழியும்
திருநிலைக்கத் திகழுகின்ற தீந்தமிழும் உயிரன்றோ?

பெயரிலென்ன இருக்குதென்பார் பேதையரும் வெட்கமின்றி
அயல்மொழியை அடிமையென தொழுதிடுவார் மானமின்றி

தான்பிறந்த இனக்குழுவின் தண்மைகளைச் சுவடுகளை
தான்சுமக்கும் பேரன்றோ தனித்துவமாய் தான்நிற்கும்

தாய்மொழியை மறந்தயினம் தன்னிருப்பை இழந்துவிடும்
தாய்க்கலைகள் பண்பாட்டை தானிழந்து தனிமைப்படும்
வாய்ச்சொல்லில் வீரரென வாழுகின்ற தமிழர்களே
நோய்நீங்கி நொடிப்பொழுதும் சோராது களமிறங்கி
தாய்தமிழில் பெயர்ப்பலகைத் தானெழுத உறுதியேற்பீர்
காய்நகர்த்தும் அரசியலார் கயமைகளை முறியடிப்பீர்
பேய்போலே பணம்தேடி ஓடுகின்ற வணிகர்களே
போய்ப்பாரும் உலகிலெங்கும் உம்மைப்போல் மடையருண்டோ?

அவரவரின் தாய்மொழியில் அழகாகப் பெயர்ப்பலகை
அலங்கரிக்கும் வீதியெங்கும் அதுவன்றோ தனிப்பெருமை
தவறாகப் பிறமொழியில் எழுதிவைத்தல் இழுக்கன்றோ?
தமிழர்களே தாய்தமிழில் எழுதிடுவீர் பெயர்ப்பலகை
எவருக்கும் தாள்பிடிக்கா எழுச்சிமிகு ஆற்றலுடன்
எழுதிடுவீர் பெயர்ப்பலகை நம்மொழியாம் செம்மொழியில்
சுவருக்கும் வாயிருந்தால் சூழுகின்ற அயல்மொழிகள்
தவறாமல் துப்பிவிடும் தூயதமிழ் மொழிப்பற்றால்

இனத்தின் இருப்பை இனமான நெருப்பை
இருத்திட தமிழில் எழுதுகப் பலகை

மொழியின் மான்பை விழியாய்ப் போற்ற
முதலில் எழுதுக தமிழ்ப் பெயர்ப் பலகை

வளரும் தலைமுறை வருங்கால வழித்தோன்றல்
வசையற எழுதுக வண்டமிழ்ப் பலகை

வரலாற்றுப் பிழைஞர் வரிசையில் நீங்க
திடமாக எழுதுக தெளிதமிழ்ப் பலகை

{தனித்தமிழ் இயக்க விழாவில்20-01-2012 அன்று படிக்கப்பட்ட பாடல்}

தானே............

2012-01-07T10:20:00.000-08:00

2011 ஆம் ஆண்டின்
கடைசி நாட்களை நினைத்தால்
கண்ணீர் தான் காட்சியாகிறது.

பிறக்கும் புத்தாண்டை
வரவேற்க காத்திருந்தவர்களுக்கு
வருடும் தென்றலிடமிருந்து
வந்தது பேரிரைச்சல்

ஓலமிட்டு
ஓங்கி வளர்ந்த மரங்களையெல்லாம்
ஒரு கைப் பார்த்து
கூளமென கூட்டிச் சுருட்டி
குதறித் தள்ளியது.

இடுப்பொடிந்த
மின்கம்பங்கள்

இலை,கிளை மட்டுமா?
தலை அடியென
தங்களை இழந்த தாவரங்கள்

ஆள்வைத்து வெட்டினாலும்
அப்படித் துண்டாட முடியுமாவென
அதிர்ச்சிக் குள்ளாக்கும்
அழிந்த தென்னந்தோப்பு

நூற்றாண்டு கண்ட மரங்களும்
நொடியினில் அழிந்தன
கூற்றென தானே வந்த
தானே புயலால்

அடர்ந்த மரங்களில்
தொடர்ந்து உறங்கிய
அனைத்து பறவைகளும்
அடியோடு மாண்டன

புதுவைக் கடற்கரைச் சாலை
கல்வீசித் தாக்கப்பட்டு
கோமாவில் கிடந்தது

வீதிகள் தோரும்
நாதியற்ற பிணம் போல
நடுத்தெருவில் கிடந்தன
ஊதி எறியப்பட்ட
உயிரற்ற பொருளனைத்தும்.

ஊடகங்கள் செயலிழந்து
உறவுகளும் தொடர்பிழந்து
ஆடு மாடு கோழியெல்லாம்
ஆவியடித்தது போல்
அகால மரணத்தில்.

காற்றுக்கேன் இந்தப் பகை?
கூற்றுக்கேன் இந்த வேடம்?

மலையரசி

2011-07-24T10:51:00.000-07:00

கொடைக்கானல் மலையரசி குளிர்ச்சித் தருகிறாள்-எங்கள்
குழந்தை மனத்தை மறுபடியும் மலர்ச்சி செய்கிறாள்
அடைமழையாய் பெய்து எம்மை அலைக்கழிக்காமல்
அன்புக்குளிர் அரவணைப்பில் அகமகிழ்கிறாள்
உடைநூறு உடலுக்கு உடுத்திக் கொள்ளாமல்
உள்ளம் மகிழ உணர்ந்து நெகிழு உதவிசெய்கிறாள்

வானளவு உயர்ந்து நிற்கும் மரங்களினாலே
வருடம் முழுதும் மழைபெய்து வளமை சேர்க்கிறாள்
ஆனமட்டும் மனிதன் சேர்க்கும் கழிவுகளாலே
அவளுந்தான் கற்பிழந்து கலங்கமடைகிறாள்

கோணல்புத்தி மனிதர்களே கொஞ்சம் நில்லுங்கள்
கோடைக்கானல் குமரிகற்பை சூரையாடாதீர்
மோன நிலையில் நிற்கும் மரங்கள் சாட்சியல்லவா?-அவை
முழுதும் நம்மைக் காக்கின்ற காட்சியல்லவா?

நகரக்கழிவு பொருட்கள் எதற்கு நாசமாக்கவா?-இயற்கை
நமக்களித்த பொக்கிஷத்தை மோசமாக்கவா?
அகரமுதல அறிந்தபின்னும் அறிவில்லையா?-அன்னை
அடிமடியில் கைவைத்தல் அழிவில்லையா?

மலையும் காடும் மனிதயினத்தின் சொத்தல்லவா-அவை
மலரும் புதிய சந்ததிக்கும் வித்தல்லவா?
குலையும் நடுங்கக் குழிபறித்தால் மண்பொறுக்குமா?-மலை
குடைசாய்ந்தால் என்னவாகும் ஊர்பிழைக்குமா?

உயர்ந்த மலைச்சிகர அரசி மடியினைக் காப்போம்
உயிர்கள் வாழ சூழல்காத்து உண்மையாய் இருப்போம்
அயர்ந்து அழிவைச் செய்யும்வேலை அடியோடு மறப்போம்
அழகுக் கொடைக்கானல் மலைக்கு ஆரத்தி எடுப்போம்

மாபெரும் சபைதனில் நீ நடந்தால்....

2011-07-09T18:00:00.000-07:00

ஆயிரங் கோடிப் பணமிருந்தாலும்
ஆறுதல் அடைவதில்லை-மனிதன்
ஆலய மாயிரம் சென்று வந்தாலும்
ஆசைகள் விடுவதில்லை

நோயினில் நொந்துப் படுத்திருந்தாலும்
நாயாய் அலைகின்றான்-பணத்தை
ஆயிர மாயிரம் தவறுகள் செய்தும்
குவித்திடத் துடிக்கின்றான்

ஊருக்கு உழைத்திடும் எண்ணமில்லாமல்
உறவுக்குச் சேர்க்கின்றான்-என்றும்
பாருக்குள் பெரியப் பணக்காரனாகவே
பாவங்கள் செய்கின்றான்

காரும் பணமும் பங்களா சுகமும்
கண்டிடத் துடிக்கின்றான்-மேலும்
ஆறும் காடும் மலையும் சுருட்டிட
ஆலாய்ப் பறக்கின்றான்

யாரும் பார்க்க வில்லையென்றே
எதுவும் செய்கின்றான்-நல்ல
சீரும் சிறப்பும் நிறையும் வாழ்வை
சீக்காய் மாற்றுகின்றான்

உலக நடப்பை உணர்ந்தே வாநீ
உருப்பட என் தோழா -நாட்டில்
கலகம் செய்தேனும் காரிருள் விரட்ட
கைகோர்த்து வா தோழா

நிலவும் சாதி சமயவெறி எரித்திட
நீ வா என் தோழா-மண்ணில்
உலவும் கயவர் உயிரைக் குடித்திட
உணர்வோடு வா தோழா

செய்யும் செயல்களால் சீரிய மன்றம்
சிறப்புகள் செய வேண்டும்-உந்தன்
உய்யும் உழைப்பால் உலகமே உன்னை
உயர்வுகள் செய வேண்டும்

மெய்யன்பு நிறைந்த மேன்மை பணியால்
மேடைகள் உனைப் பாடும்-உன்
கையும் கருத்தும் கறைபடாதிருந்தால்
காலம் உனைப் போற்றும்

சொந்தம் மறந்து சுயநலம் துறந்தால்
சூழல் உனைப் புகழும்-உலகின்
எந்தச் சபைதனில் நீ நடந்தாலும்
ஏற்றம் உனைப் பணியும்

ஏன் வேண்டும் கவிதை?

2011-06-17T18:43:00.000-07:00

துள்ளிவரும் சொல்லாலே உணர்வைத் தூண்டி
தூங்காமல் எழுப்பவேண்டும் கவிஞர் பாட்டு
அள்ளியவர் தருகின்ற அமுத பாடல்
அடிமைகளை ஆர்ப்பரிக்க வைக்கும் வேட்டு
எள்ளிநகை யாடிவிடும் எத்தர் தம்மின்
எலும்புகளை ஒடித்துவிடும் ஏற்றப் பாட்டு
கொல்லியென குலத்துரோகம் புரிவோர் ஆவி
குடித்துவிடும் கூர்மதியார் கூறும் பாட்டு

பல்லிளித்து பாசாங்கு புரிவோர் வெட்டி
பாடையிலே ஏற்றிவிடும் பட்டாக் கத்தி
நல்லிளைஞர் நரம்புகளில் நாணை யேற்றி
நச்சுகளை நசுக்கிவிடும் நல்ல பாட்டு
வல்லவராய் நல்லவராய் வளர்வோர் வாழ
வழிவகைகள் வழங்குகின்ற வளமார் சீட்டு
தொல்லுலக மக்களெல்லாம் போற்றும் வண்ணம்
தூயவரே தொடர்ச்சியாக தருவீர் பாடல்

சேவகர்

2010-12-25T09:05:00.000-08:00

திடீரென்று தெருக்களில்
சமூக சேவகர்கள்
படையெடுக்கின்றார்கள்.

குப்பைகளை அள்ளுகிறார்கள்
குழந்தைகளைக் குளிக்கவைக்கிறார்கள்
தொப்பைகளைத் தூக்கிக்கொண்டும்
தெருத்தெருவாக நடக்கிறார்கள்

மகளிர் குழுக்களுக்கு
மாமன்கள் போல
புடவைகள் கொடுத்து
போட்டோ எடுத்துக்கொள்கிறார்கள்.

ஒரு கிலோ
சர்க்கரைக் கொடுத்து
ஒரே நாளில்
ச.ம.உ ஆகிடத் துடிக்கிறார்கள்.

பொதுநல விரும்பிகளாக
பொழுதெலாம் காட்டிக்கொண்டு
அறுவடை செய்திட
அடுத்த தேர்தலை எதிர்நோக்குகிறார்கள்.

மரண வீடுகளில்
மாலைகளோடு வந்து
அழுபவர்களிடத்திலும்
ஆதரவு திரட்டுகிறார்கள்.

தேர்தல் முடிந்துவிட்டல்
திரும்பிப் பார்க்காமல்
நான்காண்டு காலம்
காணாமல் போவார்கள்.

சமூக சேவகர்கள்
நடிப்பையே மூலதனமாக்கி
நாட்டு மக்களை
மொட்டையடிப்பார்கள்.

முடி வளரும்
என்ற நம்பிக்கையிலேயே
நன்றாக மறுபடி மறுபடி
தலையை நீட்டும் பொதுமக்கள்

பெருவலி

2010-11-24T06:41:00.000-08:00

எழுதிட நாளும் நினைக்கிறேன்
எதையோ எழுதிக் குவிக்கிறேன்
முழுவதும் கவிதை என்றிட
முடியாமல் நானும் தவிக்கிறேன்
பழுதிலாப் பாடல் படைத்திட
பலமுறைக் காகிதம் கிழிக்கிறேன்
வழுவிலா வாழ்க்கை அமைந்திட
வரிகளில் கருத்தை படைக்கிறேன்

படித்திடப் புத்தகம் திறக்கிறேன்
பார்த்து வேர்த்து மலைக்கிறேன்
வடித்திடக் கவிதை நினைக்கிறேன்
வாய்க்கும் நெஞ்சுக்கும் நடிக்கிறேன்
துடித்திடும் நெஞ்சின் வலிகளை
தும்பைப் பூதாள் இறக்கிட
படித்திடும் வாசகர் அடைந்திட
பக்குவம் தெரியாமல் விழிக்கிறேன்

புவியுடை பொறுமை இல்லாமல்
புதுப்புது முயற்சிகள் செய்கிறேன்
எதுவென கவிதைப் புரிபட
இதுநாள் வரையினில் முயல்கிறேன்
புவியினைப் புரட்டிய புலவரே
புதுமைப் பூக்கும் முத்தமிழே
கவிதை எழுதிடக் கைகொடு
காலம் நிலைத்திட மடிகொடு

புதுவையில் பாரதி

2010-11-08T06:35:00.000-08:00

எட்டய புரத்தினில் எழுந்த நெருப்பவன்
எங்கள் கவிபாரதி
கிட்டிய வரமென கீர்த்திப் பெரிதென
கிடைத்த நவபாரதி
தொட்டில் குழவியும் தூயப் பெரியோரும்
தோழமைக் கொண்டிடுவார்
கட்டிய வேட்டியும் காலில் சப்பாத்தும்
கண்டவர் மெய்சிலிர்ப்பார்

புதுவையில் தங்கியப் புரட்சி நெருப்பவன்
புதுமை பலபடைத்தான்
இதுவரை எழுதாத இறவாத இலக்கியம்
இங்கேதான் படைத்தான்
வதுவையர் உரிமைக்கு பாஞ்சாலி சபதம்
வார்த்து எழுதிவைத்தான்
புதுமையாய்க் குயில்பாட்டு புரட்சியை இங்குதான்
புடம்போட்டு பாடிவைத்தான்

மணக்குள விநாயகர் மாண்புகள் போற்றியே
மகத்தான பாடல் படைத்தான்
கணக்கின்றி கவிதைகள் கண்ணன் மேல்பாடி
காதலை எடுத்துரைத்தான்
உணர்வோடு குயில்தோப்பில் உலாவந்தவன்
உட்பொருள் புரியவைத்தான்
உணவுக்கு வைத்தரிசி உற்சாகப் படையலிட்டு
உறவாக காக்கை நினைத்தான்

அதிகாலைப் பொழுதினில் அலைகடல் மணலில்
ஆனந்தமாய் நடப்பான்
உதிக்கின்ற சீரியன் மறைகின்ற காட்சியும்
உணர்வோடு கண்டுகளிப்பான்
நிதியில்லை என்றாலும் நெஞ்சினை நிமிர்த்தியே
நித்தமும் நடைபயில்வான்
நதிபோலே எப்போதும் தடைதாண்டி தம்பயணம்
நன்றாக தொடர்ந்துசெல்வான்

பாரதி வந்ததால் பழையன கழிந்துமே
புதுச்சேரி யானதிங்கே
பாரதி வாழ்ந்ததால் பாரத தேசமே
பார்வையைத் திருப்பியது
பாரதி காட்டிய புதுநெறிப் பாவலர்
பாட்டையை மாற்றியது
பாரதி ஓட்டிய 'பா'ரதம் புதுமைக்குப்
பாடமாய் ஆனதிங்கே

பாரதிக் கழற்றி கனகலிங்கம் ஏற்றிப்
பூணூலைப் புனிதமாக்கினான்
பாரதி பூனைப் பாட்டாலே ஒற்றுமை
பாரினில் வழிகாட்டினான்
பாரதி புதுமைக்கு புதுவையே முதற்களம்
பாடுவோம் தோழர்களே
பாரதிக் காப்பென்று பல்லாண்டு பாடுவோம்
பாடுவோம் வாருங்களேன்

மாற்றிக் காட்டுவோம்

2010-08-22T04:14:00.000-07:00

மாற்றம் என்பதே மாறாத் தத்துவம்
மார்க்சிய அறிஞரின் மந்திர வாசகம்
ஏற்றம் பெற்றிட ஏழைகள் வாழ்வில்
ஏற்றுவோம் உரிமை விளக்கினை நாளும்
கூற்றுவன் நினைத்து குலைந்துப் போகாமல்
வேற்றுமைகள் போற்றி பிரிந்து நிற்காமல்
மாற்றிக் காட்டிட மானுட சமுத்திரம்
போற்றிக் காத்திட புறப்படுத் தோழனே

கேடுகள் சூழ்ந்தக் கீழ்மை உலகினைக்
கிளர்ச்சி செய்தே கீழ்மேல் புறட்டி
மேடுகள் பள்ளம் ஓர்மை யாக்கி
மேதினி எங்கும் பொதுமைப் புகுத்திக்
கோடுகள் அற்றக் கோளப் படத்தினைப்
கொண்டே உலகில் குடிகள் வாழ்ந்திட
பீடுடை பொதுமை உலகினை நாமும்
படைப்போம் வாரீர் பாரை நன்றாய்

உடல் தானம்

2010-08-17T17:36:00.000-07:00

குருதிக் கொடையளிக்க
கூவி அழைத்தாலும்
கூப்பிட்டால் வருவோர் யார்
குமுகாய வீதிகளில்

உறுப்பு கொடையளிக்க
உற்றாரும் உறவுகளும்
விருப்போடு வருவதில்லை
வீணாச்சு பல உயிர்கள்

கண்ணப்பன் விழிக்கொடை
கர்ணனவன் குருதிக்கொடை
கர்மவீரன் ஜிதேந்திரன்
காட்டிய உடல்கொடை

வாழும் தலைமுறைக்கு
வழிகாட்டி சென்றபின்னும்
பாழும் மடமைகளால்
பார்த்திருத்தல் சரிதானா?

மூளை இறந்தபின்னே
முழு நிலமை புரிந்தபின்னே
ஆளை இழந்தபின்னே
அழுது புலம்புவதேன்?

மரங்கூட கிளைகொடுத்து
மண்ணில் பலமரங்கள்
வரமாக அளிக்கிறதே
வாழக் கற்றுக் கொள்வோம்

செயலிழந்த உடலுக்குள்
சாகாத உறுப்புகளை
இயலாத மாந்தருக்கு
எடுத்து வைத்தல் நலந்தானே?

செத்தபின்னே சிவலோகம்
செல்லுவதை யாரரிவார்
புத்தியுடன் உடல்கொடை
பூமிக்கே பெருங்கொடை

செம்மொழி

2010-07-29T17:45:00.000-07:00

பிறந்த பெருமையினை
மறந்த தமிழர்களும்
சிறந்து வளர்ந்த தமிழ்
செம்மொழியாய் ஆனதென்று
செம்மார்ந்து நிற்க்கின்றார்.

வழக்கொழிந்த வரிசையிலே
வண்டமிழை நிறுத்துதற்கு
கழைக் கூத்தாடி போல
காட்சிகளை நடத்துகின்றார்.

பிள்ளைமொழி தமிழில்லை
பேச்சுமொழி தமிழில்லை
பள்ளியிலே தமிழில்லை
பல்லிளித்தே புகழுகின்றார்

இருப்பதைக் காப்பதற்கே
இயலாத ஈனர்கள்
பெருக்குவதாய் புளுகுமூட்டை
பேணர்கள் வைக்கின்றார்.

நெருக்கடிகள் வந்தால்தான்
நினைக்கின்றார் தாய்மொழியை
செருப்படிகள் பட்டபின்பே
செந்தமிழை சீண்டுகின்றார்

வருவோன் போவோன் எல்லாம்
வாய்கிழியப் பேசுகின்றான்
வருவாயை சுருட்டிடவே
வாழ்க தமிழ் என்கின்றான்

யாரென்ன செய்தாலும்
எந்நாளும் இளமையுடன்
எந்தமிழும் விளங்கிடுமே
எதிரிகளை இனங்காண்போம்

மலையருவி Dr.N.Ilango: வெள்ளைத் திமிர் மு.பாலசுப்பிரமணியனின் கலகக்குரல்#links

2010-06-02T10:57:00.000-07:00

மலையருவி Dr.N.Ilango: வெள்ளைத் திமிர் மு.பாலசுப்பிரமணியனின் கலகக்குரல்#links

மே நாள்

2010-04-30T09:01:00.000-07:00

இத்தரை மீதினில் எத்தனைத் தோழர்கள்
நித்தமும் உழைத்து நிலத்தினைத் திருத்தினர்
கொத்தடி மையாக கூலியா ளாக
அத்தனை வலியும் தாங்கிக் கிடந்தனர்

சிகாகோ நகரில் சேர்ந்த தொழிலாளர்
சிந்தித்து பேசி சீரிய முடிவினை
சிகரமாய் எடுத்தனர்;சிவப்புக் கொடியினை
சேர்ந்து பிடித்தனர்; ஓங்கி முழங்கினர்

கூழுக்கும் கூலிக்கும் கூவி அழுவதா?
கூனராய் எப்போதும் குனிந்தே கிடப்பதா?
வேலிக்குள் அடைபட்ட விலங்கெனக் கிடப்பதா?
வேழமே எழுந்துவா விலங்கை ஒடித்துவா

ஆலைக்குள் அகப்பட்டு ஆவியை விடுவதா?
ஆளுக்கு ஆள்மிரட்ட அடிபணிந்து வீழ்வதா?
சோலைக்குள் சுதந்திரக் காற்றை சுவாசிக்க
வேலைக்குள் வருவாய் விழிப்பாக இருப்பாய்

எட்டுமணி நேரவேலை எம்தோழர் வென்றநாளை
கொட்டிக் கொட்டி எல்லோரும் கூட்டமாய்
பட்டி தொட்டி எல்லாமும் பாடிக் களிப்போமே
தட்டித் தட்டிக் கைசேர்த்து தாளமிடுவோமே

ஆண்களும் பெண்களும் அணிதி ரள்வோமே
ஆனந்தக் கும்மி யடித்து மகிழ்வோமே
ஆனவ முதலாளிக் கொட்டத்தை யடக்க
பூணுவோம் உறுதி பாடிவா தோழனே

சேர்ந்துவா தோழனே செகத்தினை மாற்றுவோம்
செம்மார்ந்து தொழிலாளர் செருக்கினைப் போற்றுவோம்
ஆர்த்துவா தோழனே அணிவகுத்து செல்லுவோம்
ஆயிரம் தடைதகர்த்து மேநாள் போற்றுவோம்

புரட்சிக்கவி

2010-04-29T10:24:00.000-07:00

பாவேந்தன் பாட்டென்றால் அனல்பறக்கும்
பழமூட வழக்கங்கள் அழிந்தொழியும்
கூவுகின்ற குயில்பாட்டும் புரட்சியாகும்
குத்தீட்டிக் கவிதைகள் குவிந்திருக்கும்

ஆரியத்தை அழித்தொழிக்க அடியெடுத்தார்
ஆட்சிமொழி தமிழாகத் தடியெடுத்தார்
ஓரிடத்தில் குட்டையெனத் தேங்காமல்
ஊருலகம் பாட்டாலே சென்றடைந்தார்
யாரிடத்தில் உரைத்தாலும் அவர்பாட்டை
ஊறிவரும் உணர்வுவீச்சு கண்டிருப்பீர்
சூரியனாய் சுட்டெரிப்பார் கொடுவழக்கம்
சுத்ததமிழ் வீரர்பா வேந்தர்தான்

தமிழுக்கு எதிராக எவரேனும்
தம்கருத்தை வெளியிட்டால் கொதித்தெழுந்து
துமிக்கியென வெடித்திடுவார்; பாவேந்தர்
தூள்தூளாய் ஆக்கிடுவார் தமிழ்பகையை
இமியளவும் ஈரமிலா நெஞ்சத்தாரை
இழுத்துவந்து தெருவினிலேப் போட்டுதைப்பார்
தமிழ்த்தெருவில் தமிழ்க்கடையில் பெயர்ப்பலகை
தமிழிலேயே வைத்துவிட ஆனையிட்டார்

பொதுவுடைமை பகுத்தறிவுப் போர்வாளாய்
புதுவுலகம் படைக்கின்றப் புரட்சியாளன்
வதுவையர் உயர்த்துகின்ற காவியங்கள்
வழங்கியவன் வணங்காத பாட்டுவேந்தன்
முதுதமிழை மூச்சாகப் போற்றியவன்
மூடராக இருந்தவரை மாற்றியவன்
எதுவரினும் தன்கருத்தை நிறுவியவன்
ஏற்றமிகு கவிச்சித்தன் பாவேந்தன்

மகளிர் இட ஒதுக்கீடு

2010-04-10T09:47:00.000-07:00

உன்னில் பாதி பெண்மையடா
ஒதுக்கல் என்ன நீதியடா
எண்ணம் முழுதும் ஆதிக்கம்
ஏய்த்தாய் பெண்ணைப் போதுமடா
என்னக் கொடுமை ஆடவரே
இன்னும் மசோதாக் கலந்தாய்வு -ஒருக்
கண்ணில் வெண்ணெய் சுண்ணாம்பு
கதையாய் இன்னும் தொடருவதா?

சரிபாதி உரிமை உடையவளை
சனாதனம் பேசி ஒடுக்குவதா?
மரியாதை தானா மகளிரையே
மட்டம் தட்டிப் பேசுவது
உரிய இடத்தை மகளிருக்கு
உடனே வழங்கல் கடமையடா
சரியாய் சொல்வீர் பெண்ணுரிமை
இனாமா? இல்லை வாழ்வுரிமை

அச்சம் நாணம் தூக்கியெறி
அடிமைத் தளையை உடைத்தெறி
மிச்சம் மீதி உண்ணல் ஒழி
மீட்டு உரிமை நாட்டிவிடு
அச்சன் கணவன் வல்லாண்மை
அடங்க மறுத்து அத்துமீறு
பிச்சைய யல்ல ஒதுக்கீடு
பெண்ணே எதற்கு கூப்பாடு?

கொடையாய் மென்மை பெற்றவளே
கொடுமை எதிர்க்க வா வெளியே
நடையில் அன்னம் ஆனாலும்
நாட்டு உனது பிறப்புரிமை

செம்மண் குட்டை

2010-04-06T09:13:00.000-07:00

வடக்கே ஆறுகளில் வெள்ளம்
வறட்சியில் வாடும் தெற்கு வாழ்ந்திட
மறுத்திடும் வடவர் உள்ளம்

தலையும் கொடுப்பேன்

2010-02-26T10:51:00.000-08:00

வயிறே எனக்கு வாழ்க்கையில்லை
வாழும் தமிழே என்விருப்பம்
உயிரும் தருவேன் தாய்தமிழ்க்காய்
உலகும் எதிர்ப்பேன் தமிழ்மொழிக்காய்
கயிறே என்னைக் கவ்விடினும்
கலங்க மாட்டேன் தலைகொடுப்பேன்
துயரை மறந்து தூயதமிழ்
துலங்கிட நானும் தொண்டுசெய்வேன்

தாயும் தந்தையும் தவழ்ந்தமண்ணில்
வேறி னத்தான் வேறூண்ற
நாயாய் காலை நக்கியவன்
நம்பிக்கைப் பெற்று இருப்பேனா?
பாயும் புலியாய் பகைமுடிப்பேன்
பைந்தமிழ் வீரம் காத்துநிற்பேன்
நோயாம் அயல்மொழி மோகத்தை
நொடியில் விரைந்து அழித்தொழிப்பேன்

வாழும் வரைக்கும் வளர்தமிழின்
வளர்ச்சிக் காகக் கைகொடுப்பேன்
சூழும் பகையைச் சுட்டெரித்து
சுடர்விட தமிழ்மொழிக் காத்திடுவேன்
வீழ்ந்த தமிழர் வீரமண்ணை
விரைவில் மீட்டு விடுதலைப்பண்
ஈழ மண்ணில் இசைத்திடுவேன்
இயலும் வரையில் ஓயமாட்டேன்

எழுந்து வாடா

2010-02-22T08:06:00.000-08:00

தன்னினத்தை எல்லோரும் உணருகின்றான்
மண்மொழியைக் காத்திடவே ஓடுகின்றான்
தன்மானம் இல்லாத தமிழா நீதான்
அன்னை நாடெனவே புலம்புகின்றாய்
அண்மையிலே ஐதராபாத் நகரத்திலே
அன்புதமிழ் இளைஞரும் யுவதிகளும்
நன்மதிப்பெண் பெற்றார்கள் பொதுத்துறையின்
பொன்னான வேலைக்கு ஆளெடுப்பில்

தெலுங்கானா கோருகின்ற தெலுங்கரெலாம்
வலுக்கட்டா யமாக ஒன்றிணைந்து
இளைஞர்கள் அனைவரையும் ஓடோட
கொலைவெறியால் அடித்துதைத்து விரட்டினார்கள்
வலுவாக தம்மெதிர்ப்பை யாருமிங்கே
சிலர்கூடக் காட்டவில்லை தமிழர்களே
குலமானம் காத்திடவே துணியவில்லை
சிலைபோலே இருக்கின்றார் அவமானம்

தமிழ்வீரன் மாண்டாலும் கலங்கமாட்டாய்
தமிழ்நதிகள் காய்ந்தாலும் கலங்கமாட்டாய்
உமிழ்நீரின் சுவைகண்டு உறங்குகின்றாய்-சாதி
சிமிழுக்குள் சந்ததியைப் புதைக்கின்றாய்
தமிழ்நாட்டை திரைநாய்க்கே விற்றுவிட்டாய்
தமிழ்வீட்டை தொடர்களிலே தொலைத்துவிட்டாய்
இமியளவும் இனமானம் இல்லையாடா
உமியாக வாழ்வதிலோர் பொருளுமுண்டா

இனத்துக்கோ மொழிக்கோ இன்னலென்றால்
கணத்துக்குள் களமிறங்கி ஆடவாடா
பணத்துக்கும் புகழுக்கும் பல்லிளித்தால்
உனக்கேது உடலுக்குள் தமிழ்குருதி
அனலாக அடங்காது தமிழ்பகையை
சினங்கொண்டு சீறியுடன் எரிக்கவாடா
பிணமாகக் கிடக்காமல் பீடுகொண்டு
இனமானத் தமிழனாக எழுந்துவாடா

வன்பகடி

2010-02-19T09:22:00.000-08:00

வன்பகடி செய்கின்ற வன்முறை மாணாக்கர்

தம்தவற்றை தாமறியப் பெற்றோரே -நன்முறையில்

கண்ணியமாய் நல்லொழுக்கம் கற்பித்து காலமெல்லாம்

மண்ணில் வளர்ப்பீர் அறம்

மெழுகு

2010-01-03T00:56:00.000-08:00

அழகுக்காப் பெண்களின் தேகம்

அன்றாடம் விளம்பரத்தில் மோகம்

ஆடவரின் உள்ளாடை

அனைத்தபடி நிற்கின்றார்

மெழுகாக விளம்பரத்தில் சோகம்

தமிழா தமிழா

2010-01-01T08:33:00.000-08:00

உலகம் முழுமையும் 2010 புத்தாண்டைக் கொண்டாடுகின்ற இந்த வேளையில் உலகத்தோடு ஒழுகும் தமிழர்களும் கொண்டாடுவது நல்லது.ஆனால் தொண்மையான ஒரு இனம் ,பழங்காலந்தொட்டே இலக்கிய வளமும் இலக்கண செழுமையும் கொண்ட ஒரு ஒப்பற்ற தாய்மொழியை உடைய ஒரு இனம்,தன் இனத்தின் -மொழியின் மேன்மையை அறியாமல் அந்நிய மொழியின் மீதும் கலாச்சாரத்தின் மீதும் மோகம் கொண்டு அலைவது தேவையா?நம்முடைய குழந்தைகளுக்குத் தமிழ்ப் பெயர் இடுவதை மறந்துவிட்டோம்.பண்டைய பழக்க வழக்கங்களைத் தொலைத்துவிட்டோம்.இப்படி நமக்காண அடையாளங்கள் எல்லாவற்றையும் இழந்து நிற்கிறோம்.எதனால் என்று யாராவது சிந்தித்தோமா?.பழம்பெருமைப் பேசுவதாக பலர் நினைக்கலாம்.ஆனால் பழமையை மறந்தவர்கள் வரலாற்றை மறந்தவர்களாகிறோம் என்பதை எத்தனை பேர் நினைக்கிறோம்.
சரித்திரத் தேர்ச்சி கொள் என்ற பாரதியின் வாக்கை ஒரு நிமிடம் நினைத்துப் பாருங்கள்.சரித்திரம் பாடமாகப் படித்தால் மட்டும் ஆகாது.அதில் தேர்ச்சி இருந்தால் தான் ஒரு இனம் தன் விழுமியங்களை பாதுகாக்க முடியும் என்பது பாரதியின் வாக்கு.உலகலாவியப் பார்வை வேண்டும் அதே சமயத்தில் தன் மொழி ,இனம் ,மண் குறித்த அக்கறை ஒவ்வொரு மனிதனுக்கும் வேண்டும் .அப்படி நினைக்கிற இனம் தான் தன் அடையாளங்களை இழக்காது அடுத்து வருகிற தலைமுறைக்கு வழிகாட்டியாக இருக்க முடியும் .
ஆங்கிலப் புத்தாண்டை அமர்க்கலமாக்க் கொண்டாடிய உலகத் தமிழர்களே! அடுத்து தைத்திங்கள் முதல்நாள் நம் தமிழ்ப் புத்தாண்டு வருகிறது.இதைவிடவும் அதிக உற்சாகத்தோடு கிராமச் சமுதாயமாக்க் கொண்டாடியதுபோல் ஊரோடும் உறவோடும் கொண்டாடி மகிழ ஆயத்தமாகுங்கள்.தமிழன் என்றோர் இனமுண்டு தனியே அதற்கோர் குணமுண்டு எனபதை நிரூபிக்கும் வண்ணம் ,கொண்டாடி மகிழ கூடி வாருங்கள்.
தமிழன் என்று தலை நிமிர்ந்து சொல்லுங்கள்.
தமிழ், தமிழர் பகைகளை வெல்லுங்கள்

சமபந்தி

2009-12-14T06:50:00.000-08:00

பெரிய தேசமாய்
பேரெடுக்கவே
அட்டகாசம்

வளர்ச்சிக்குப் பதில்
வீக்கமே
பெருமைக் கொள்ளப்படுகிறது

கல்வி
சுகாதாரம்
வியாபாரம்.

ஆனாலும்
ஒரே நாடாய் இருக்க
அழுத்தங்கள்

மண்ணின் மைந்தருக்கு
மறுக்கப்படும்
உரிமைகள்

விழிப்புற்றுத்
தன்னுரிமைக் கோரினால்
தாங்காத சினம்

தெலுங்கானா உதயம்
தேசத்துக்கும் பெருமை
தெலுங்கருக்கும் நன்மை

தேசிய இனங்களின்
தன்னாட்சியே
மாசிலாத மக்களாட்சி

வீட்டுக் குழந்தைகள்
பட்டினியால் சாக
வீதியில் ஏனடா சமபந்தி?

EYE TV INTERVIEW

2009-12-07T06:18:00.000-08:00

முண்டம்

2009-12-02T09:25:00.000-08:00

அருணாச்சலத்தில்
அண்டை சீனாவின்
அத்துமீறல்.

வங்கதேச எல்லையில்
வழியற்ற மக்களின்
ஊடுறுவல்.

வடகிழக் கெங்கிலும்
வந்தேரிகளின்
அட்டகாசம்

பாகிஸ்தான் எல்லையில்
நிரந்தரமாய்
போர் மேகம்

வடக்கெல்லை முழுவதும்
வருத்தும் குளிரில்
அணிவகுப்பு.

கடற்பகுதி முழுவதும்
கட்டுப் பாடற்ற
சூரையாடல்.

ஆன்லைனில்
அதிபர் ஒபாமாவுடன்
அந்தரங்க உரையாடல்

முண்டங்களுக்கு
முழுநேரப் பணி
அரசியல்.

நிர்மூலம்

2009-12-01T09:18:00.000-08:00

முன்பு
செப்டம்பர் 11 பாரதி
டிசம்பர் 6 அம்பேத்கர்
ஆனால்
இப்போதோ
நம் நினைவுகளை நிர்மூலமாக்கி
இரட்டைக் கோபுரமும்
பாபர் மசூதியும்

கொதிக்கும் பூமி

2009-11-23T22:36:00.000-08:00

பசுமை இல்ல வாயுக்கள்
பல்கிப் பெருகிக் கூடுவதும்
பசுமைக் காட்டை அழித்தலும்
பல்வேதிக் கழிவுகள் பெருகுவதும்
மினசார ஆலைக் கழிவுகளும்
மிகுந்தே பூமி சூடாச்சு
எண்ணிப் பாருங்கள் உலகீரே
எத்தணை அழிவுகள் இதனாலே

ஆழி நீர்மட்டம் உயர்ந்திடும்
அலைசார் நகரங்கள் மூழ்கிடும்
வெள்ளிப் பனிமலை உருகிடும்
வெள்ளத்தால் அழிவுகள் பெருகிடும்
வறட்சியில் நிலங்கள் பிளந்திடும்
வறுமை ஒன்றே மிஞ்சிடும் -வல்
அரசும் மக்களும் உணர்ந்தாலே
அபாயம் பூமிக்கு அகன்றிடும்

கடலுக்குள்ளே மாநாடு
கவன ஈர்ப்புத் தீர்மானம்
பனிமலைகள் மேலே மாநாடு
மக்கள் விழிக்கக் கூப்பாடு
உலகை மிரட்டி அரசோச்சும்
உயரிய வசதிகள் அனுபவிக்கும்
வளர்ந்த நாடுகள் உணரட்டும்
வசதிகள் குறைத்து வாழட்டும்

உழை

2009-10-26T10:06:00.000-07:00

மண்நனைத்து மணம்பரப்பும் மழை

மக்களையேச் சேர்ந்திருக்க விழை

மண்மைந்தர் உரிமைகளை

மறத்தோடுப் போரிட்டு

உண்மையாய் அடைவதற்கு உழை

உடை

2009-10-26T09:56:00.000-07:00

அன்னம்போல் வேண்டுகிறார் நடை

அடக்கமாக வேண்டுகிறார் உடை

எண்ணம்போல் இருந்திடவே

எதிர்க்கின்ற சதிகார

ஆண்வர்க்க ஆளுமையை உடை

அழைப்பு மணி

2009-10-26T09:47:00.000-07:00

வீட்டின் அழைப்பு மணி

வீதியில் சிறுவருக்கோ

விளையாட்டுச் செல்ல மணி.

காதலரைப் பிரிந்தவர்க்கோ

கட்டாயம் அழைப்புமணி

காதல் கவிதை மணி.

நேர்முகத் தேர்வுக்கு

காத்திருக்கும் இளைஞனுக்கோ

பணி ஆனை அழைப்பு மணி.

மருத்துவரின் பார்வைக்கு

காத்திருக்கும் நோயாளிக்கோ

மருந்தாகும் அழைப்புமணி

பள்ளி

2009-10-08T09:30:00.000-07:00

இன்று

யாழினி

பள்ளிக்குச் சென்றாள்.

நாளைப் போவோம்

என

நாங்கள் பேசிக்கொள்வோம்.

அந்த

நாளும் வந்தது.

எந்த ஆர்ப்பாட்டமும் இல்லாமல்

சிரித்து பேசிக்கொண்டே

வகுப்பறையில் நுழைந்தாள்

மனத்தில் நெகிழ்ச்சி.

குருவி

2009-10-08T09:17:00.000-07:00

காகத்திடம் அடிபட்டு

வந்தது ஒரு சிறு குருவி.

அதற்கு இணைத் தேடி

சேர்த்தோம்.

கூடவே

இன்னும் இரண்டு குருவிகள்

சேர்ந்து கொண்டன.

ஒரு நாள் காலை

அனைத்து குருவிகளின்

கால்களிலும் குருதி.

விளங்கவில்லை காரணம்.

குழந்தை மிகவும் வருந்தினாள்.

இரண்டு நாள் கழித்து

ஒரு குருவி

இறந்து போனது.

மனது வலித்தது.

குழந்தை யாழினி

சொல்லிக்கொண்டே இருந்தாள்.

கூட்டுக்குள் அடைப்பதை

விரும்பாத எனக்கு

குற்ற உணர்வு.

அழுகை

2009-09-04T09:38:00.000-07:00

ஒருத்தன் செத்தா நாடழுது

வருத்தப் பட்டு வாய் பிளக்குது

கருத்துச் சொல்லி கவலைப் படுது

திருந்துவாயா தமிழா?-இனிமேல்

வருந்துவாயா தமிழா?

விபத்துல செத்தாக் கூட

அபத்தமாக பழியைப் போட்டு

இந்தியாவே அழுது புலம்புது

சிந்திக்க மறந்தாயே தமிழா?-இப்படி

எந்திரமாய் ஆனாயே தமிழா

தமிழ்நாட்டுத் தலைவரெல்லாம்

தமிழ்மக்கள் கொலை மறந்து

தம்கட்சி கொடி இறக்கி அழுதார்

தாங்கியே பார்த்தாயே தமிழா-ஏன்

ஓங்கி நீ எதிர்க்கவில்லை தமிழா?

எந்தயினம் செத்தாலும்

இந்தியனாய் நீயழுவாய்

உந்தன் இனம் செத்தபோது -ஒப்புக்கும்

ஒருநாய் கூட அழவில்லை தமிழா

உணராமல் போனாயே தமிழா

கொத்துக் கொத்தாச் செத்தாலும்

கொலை கொலையாய் சாஞ்சாலும்

ஒத்துக்க மாட்டானே உயிராய்-உன்னை

எத்திடுவான் இந்தியன் மயிராய்-நீயும்

எப்போது புரிந்திடுவாய் தமிழா?

ஓனத்துக்கு விடுப்பளிப்பான்

ஓர்தேசக் கதையளப்பான்

ஆனமட்டும் நமக்கெதிராய்

ஆட்சி செய்யும் தலைவர்களை

அடையாளம் கண்டிடுவாய் தமிழா?

நாடு போற போக்குள

நம்ம போக்கு நல்லா இல்ல

வீடு சொத்து போதுமே தமிழா

ஆடு மாடா இல்லாம

ஆறு அறிவை பயன்படுத்து தமிழா

பாரதம்

2009-09-01T07:57:00.000-07:00

ஏ பாரதமே

உன்னைச் சுற்றிய

சிறிய நாடுகளை

மேலாதிக்கம் செய்யவே

ஓடிச் சென்று உதவிடுவாய்.

அறிந்த அவைகளும்

அச்ச உணர்வோடு

பெற்றுக்கொண்டு எட்டி நிற்கும்.

இப்படித்தான்

இலங்கைக்கும்

அழையா விருந்தாளியாய்

அள்ளிக்கொடுத்தாய் ஆயுதங்களை.

அமெரிக்காவும் சீனாவும்

அமைத்திடும் படைத்தளம்

என்ற

அச்சமே எப்போதும்.

உன்

அச்சம் வீண் போகவில்லை

சீனாவின்

வணிக கடற்தளம்

படைத்தளமாவது

வெகுதொலைவிலில்லை

ஈழத் தமிழர்களை

ஈவிரக்கமில்லாமல் கொண்றவர்கள்

நீ

பகையெனக் கருதும்

பாகிஸ்தானோடும்

கை கோர்த்துக் கொண்டு

உன்

பாதுகாப்புக்கே வேட்டு வைக்க

தயாராகிறார்கள்.

ஈழப் படுகொலைக்கு

இந்தியாவே

என்றாவது ஒருநாள்

வரலாற்றில்

மன்னிப்புக் கோருவாய்

தமிழீழம்

தனிக் கொடி படையோடு

அதை சாதிக்கும்.

வல்லரசு கனவு

பகல் கனவு.

யாழினி

2009-08-12T09:05:00.000-07:00

என்
துயரத்தையும்
எளிதில் துரத்தும்
வல்லமை படைத்த மழலை.
வாய் திறந்து வரும்
அப்பா என்ற
அந்த
ஒற்றைச் சொல்
போதும்
எல்லா அழுத்தமும்
விட்டு விலகி
மனம்
மல்லிகைப் பூவாய்
மாறிவிடும்

பாரதம்

2009-08-12T08:46:00.000-07:00

அறுபது ஆண்டு கடந்தும்

ஆனந்த சுதந்திரத்தை

அமர்க்களமாக கொண்டாடும்

பாரத பெருந்தாயே

அண்டை நாட்டில்

அனாதையாகிப் போகும்

ஒரு தேசிய இனத்தின்

அழிவுக்கு துணைபோனது

மனிதாபிமானமா?

2009-08-12T08:21:00.000-07:00

கண்டம் கடந்து

கடல் கடந்து

எண்ணம் சிறக்க

இனபம் துன்பம்

எல்லாம் பகிர்ந்து

எதையும் எதிர்பார்க்காமல்

எல்லாவற்றிலும் துணையாய்

உன் நட்புக் கரம்

என்னை நடத்திச் செல்கிறது.

காதலை விடவும்

கண்ணியம் நம் நட்பில்

உணர்ந்து சிலிர்க்கிறேன்.

மொழிக்கூட தடையில்லை

முகம் பேசும்

ஆயிரம் .

தோழர்

2009-08-12T08:06:00.000-07:00

அடம்பிடித்தேனும்

தேசியக் கொடியை

சட்டையில் குத்தி

ஊரெலாம் வலம் வந்த

என்

சக தோழனே

இப்போது

ஏன்

உன் கையில்

பச்சை அட்டைக்காக

பிச்சை பாத்திரம்

2009-08-12T07:50:00.000-07:00

விடுதலை
விடுதலை நாள் என்ன
விடுமுறை நாளா?
எடு தலை என
பரங்கியரை எதிர்த்து
உயிர் நீத்த தியாகிகளின்
வீர வணக்க நாள்

சுதந்திரம்

2009-08-06T10:44:00.000-07:00

அடிமைத்தளை உடைக்க

ஆர்ப்பரித்து எழுந்த வீரம்

உரிமை அடைவதற்கே

ஊரெலாம் அலைக்கழிப்பு

சுதந்திரம் சுமையா?

சுயமான சிந்தனைக்கு தடையா?

இதமான இளந்தென்றல் காற்று

ஈகியர் எமக்களித்த

தாய்ப்பால் போற்று

பாடல்

2009-04-24T11:09:00.000-07:00

கடைசித் தமிழனும் குண்டினில் மாண்டு
காடையர் களிப்பில் திளைத்திடும் நாளை
விடையாய் பார்க்க விரும்பிடும் தமிழா
உனையே காலம் உயிராய் விடாது
படையில் சேர்ந்து மாண்டிட வேண்டாம்
பாவம் பாரத்தும் அழுதிட வேண்டாம்
தடையாய் இராது தள்ளியே இருந்திடு
தனித்தமிழ் ஈழம் தானாய் மலரும்

ஈழம்

2009-04-24T10:12:00.000-07:00

நாதியற்ற இனமாக ஆகிடுமோ
நாளையிந்த இழிநிலையும் மாறிடுமோ
ஆதிமக்கள் அடிமைநிலை நீண்டிடுமோ
ஆண்டயினம் அழிந்தொழிந்து போயிடுமோ
போதிமரப் புத்தமதம் புரிந்திடுமா
போர்முனையில் அமைதிவர நடந்திடுமா
நீதிநெறி நிலைபெற்று நின்றிடுமா
நிம்மதியாய் வாழ்ந்திடவே முடிந்திடுமா

கைகட்டி நிற்கிறதே உலகநாடு
கரைபட்டு போனதுவே மனிதநேயம்
மைவித்தை செய்கிறதே பாரதமும்
மனசாட்சி இழந்ததுவே இலங்கையுமே
தையென்று குதிக்கிறதே சிங்களமும்
தலைவெட்டி சாய்க்கிறதே தம்மக்கள்
வையகமே வானகமே வன்கொடுமை
வாய்திறந்து மௌனியாக இருப்பதேனோ?

எம்மக்கள் சிந்தியரத் தம்யாவும்
எருவாக இன்னொருநாள் உருவாகும்
தம்மக்கள் தலையெடுத்த தருக்கர்தம்
தலையெழுத்தை தண்டணையால் முடிப்பார்கள்
சும்மாவே சொரனையின்றி சோம்பலாக
சுற்றிவர மாட்டாரே எம்மிளைஞர்
பம்மாத்து காட்டுவோரை படைகொண்டு
பாடையிலே ஏற்றியே ஓய்வார்கள்

2009-04-08T11:21:00.000-07:00

தாழ்வுற்றுக் கிடப்பதுவா நாடு
தமிழாநீ தலைநிமிர்வை நாடு
தன்மானம் காத்திடவே
தன்னலத்தை உதறிவிட்டு
ஆழ்மனத்தில் தமிழுணர்வைப் பாடு

2009-04-08T10:51:00.000-07:00

வாக்குப்பெட்டி மட்டுந்தான் குறிக்கோளா
வண்டமிழர் பரம்பரையே நரியாடா
தூக்குமரம் ஈர்த்துன்னை கொல்லாதா
தூரத்து தேசத்தில் எறியாதா
கேக்குவெட்டி கொண்டாட்டம் ஒருகேடா
கேப்பையிலே நெய்வடிதல் அறிவாடா
சாக்குச்சொல்லி வாக்குகேட்கும் சதிகாரா
சாவும்மை முத்தமிட்டு சாய்க்காதா

நீக்குப்போக்கு மட்டுந்தான் வாழ்வாடா
நீமட்டும் வாழத்தான் நிலமாடா
கோக்குபெப்சி குடிக்கத்தான் குடலாடா
கோலிசோடா கலரழித்தாய் சுதேசியாடா
தேக்குமர உடலுனக்குத் தேவையாடா
தேடிநிதம் சோறுண்டாய் தேறுவாயா
பாக்குவைத்து படைக்கழைக்க வேணுமாடா
பண்டைவீரம் பேசுவதே பிழைப்பாடா

வாக்களிக்க வரிசைநிற்கும் என்தோழா
வாடிநிற்கும் ஈழமக்கள் நிலையறிவாய்
காக்கவரும் கட்சிக்கே வாக்களிப்பாய்
காடையரை இனங்கண்டு களையெடுப்பாய்

2009-04-08T10:47:00.000-07:00

பக்தி

2009-04-08T10:08:00.000-07:00

முன்பைவிடவும்
இப்போது
பக்தி முற்றியிருப்பதாய்
அனைவருமே அங்கலாய்க்கிறார்கள்.

கோவில்கள் பெருகிவிட்டன
கூட்டம் நிரம்பி வழிகிறது
புதுப்புது வழிபாடுகள்
புற்றீசலாய் படையெடுக்கின்றன

ஒரு நாளும்
மனிதன்
தன்
சுயத்தோடு செயல்படுவதில்லை.

வாஸ்த்து
எண்கணிதம்
சோதிடம் என
அனைத்தும்
அவன் மூளையை
மழுங்கடித்து மண்ணாக்க்குகின்றன.

புண்ணாக்கு போலவே
அவன்
பொழுதெலாம் கிடக்கின்றான்

தன்னால் முடியும்
என்பதையே
அவனால்
நம்பமுடியவில்லை.

எல்லாம் அவன் செயல்
என்றே
தன் சுயத்தை இழக்கிறான்.

முன் பிறவி
வினையென்றே
தன் வினையைத்
தள்ளிப்போடுகின்றான்.

ஏழைகளுக்கு இரங்காமல்
ஏழு ஜென்மத்துக்கும்
ஏழுமலையானுக்கும்
சொத்து சேர்க்கின்றான்.

கோவில்கள் கட்டி
கூட்டம் சேர்ந்ததும்
நல்ல விலைக்கு விற்று
நகர்ந்துச் செல்கிறான்

அடுத்த ஊரில்
அதைவிடப் பெரிய
கோவிலுக்கு அடிக்கல் நாட்ட.

மனிதன் மீது
அன்பு செலுத்தாமல்்
மதங்களின் மேல்
வெறிகொண்டு அலைகிறான்.

உயிரிரக்கம் ஒன்றே
உலகில் தேவை என்பதை
உணராத பக்தியால்
முக்தியடைந்தும் ஏது பயன்?

ஏன்

2009-04-07T09:50:00.000-07:00

எதையோ எழுதத் துடிக்கிறேன்
என் பேனா என்னையும் அறியாமல்
என்
கை விரல்களின் துணையோடு
கண்டதையும் களமிறக்கிச் செல்கிறது
நான்
என்செய்வது
மூளையும் புலன்களும்
முட்டிக்கொள்ளாதவரை
நல்லபடிதான்
எல்லாம் நடக்கின்றன.
வெவ்வேறு திசைகளில்
எண்ணங்கள்
விரியும் வேளையில்
இவ்வாறு நடக்குமா
எனும்
கேள்விகளே
மிஞ்சுகின்றன.

தேர்தல்

2009-04-07T09:11:00.000-07:00

ஐந்தாண்டுக்கு ஒருமுறை
அல்லது
இடையிலும் வரும்
நம்
அரசியல் வாதிகளின்
ஆசைக்கேற்ப

சனநாயகத்தின்
சாட்சியாய் நின்று
சந்தி சிரிக்கும் சர்க்கஸ்.

கொள்கைகளும் கோட்பாடுகளும்
கோவணாண்டிகளுக்கு மட்டுமே
குத்தகை.

பணநாயகத்தோடு
பந்தயத்தில்
நொண்டி மாடுகளாய்
சனநாயகவாதிகள்.

அலங்காரங்களுக்கும்
விளம்பரங்களுக்கும்
மத்தியில்
ஆட்பட்டு
செத்துமடியும் குடியரசு.

சாதியும் மதமும்
சரியாக அலசப்பட்டு
மக்களை மந்தைகளாகவே
பாதுகாக்க நடக்கும்
திருவிழா.

காய்ந்த தலையும்
கந்தை துணியும்
கை கூப்பித்
தொழப்படும் கனவுக் காலம்.

கருப்பு பணங்கள்
வெள்ளை மனங்களை
வெட்டிச் சாய்க்கும்
கருப்பு தினம்.

ஓடி ஓடி
உழைப்பவரை
உண்டு கொழுப்பவர்
வெண்று களித்திடும்
வெரிநாள்

கற்பனைகளையே
விற்பனை செய்யும்
கட்சிகளின் சந்தை

கவிதைக்கு
சொற்களைத் தேடினாலும்
போலிகளே முந்திவரும்
கலைக்களஞ்சியம்

மழை

2008-10-24T10:06:00.000-07:00

காலம் காலமாகவே

கேட்டபோது பெய்ததில்லை

மழை

பருவகாலத்தில் மக்கள்

பூசை செய்து பயத்தோடும்

பக்தியோடும் வழிபட்டாலும்

பெய்வதில்லை

மாரியம்மன் வழிபாடும்

மழையை வேண்டிதான்

வழக்கமானது போலும்

பெய்ய ஆரம்பித்த்தால்

அடைமழையாய்

அடித்து கொட்டும்

குடிசைகள் மூழ்கி

குடியிருப்புகள் அபாய

பகுதிகளாகும்

ஒலிப்பான்

2008-10-24T09:31:00.000-07:00

வாகன ஓட்டிகள்
காதுகளற்ற ஜீவன்கள்
எப்போதும்

ஒலிப்பான்களில்
கை வைத்துக்கொண்டே
பயணம்

இயந்திரங்களின்
இரைச்சலோடு
ஒலிப்பான்களும்

காதுகளைக் கிழிக்கும்
ஒலியோடு கண்மூடி
ஓட்டம்

அலரும் சத்தத்தில்
ஆடிப்போகும் உடல்
அசுரத் தழுவல்

காதுகளைத் துளைத்து
மூலையை கசக்கி
நரம்புகளை அழுத்தும்

எரிச்சலில் எல்லாம்
இழந்த வெருப்பு
ஏறும் குருதி அழுத்தம்

வண்டிகளைப் பார்த்தாலே
வருவது எமனோ என
நெஞ்சம் குமுரும்

பேரிரைச்சல் புத்தியை
பேதலிக்க வைத்து
பேச்சை நிறுத்தும்

கழத்து வலிக்க
காதுகள் கிழிய
கண்களை மறைக்கும்

ஒலிப்பான்கள்
உயிர் குடிக்கும்
கருவிகளாய்

பாரதியே புறப்பட்டு வா புதுவைக்கு

2008-10-21T10:36:00.000-07:00

புதுமைகளைப் பாடிய
பாரதிப் புலவா
புறப்பட்டு வா நீ
புதுவைக்கு உடனே

ருஷ்யப் புரட்சியை
வரவேற்ற பாவலா
ஈழப் புரட்சிக்கு
எழுதிட நீ வா

இமயம் குமரியை
இணைத்திட நினைத்தவா
எங்கள் காவிரிக்கு
இழுத்து வா கங்கையை

காக்கைக்கு அரிசியை
படைத்த கவிஞனே
கால்வயிறு நிரம்பாதவர்
கவலைகளைப் பாட வா

துலுக்கரைத் தோழராய்
தோள்பற்றிய பாவலா
துயருறும் குஜராத்
தோழரைக் காக்க வா

யேசுவை பாடலில்
ஏற்றிய கவிஞனே
எரிந்திடும் ஒரிசாவை
எழுந்து அணைக்க வா

அதிரும் பறையொலியில்
ஆடிக் களித்திட
ஆச்சாரம் மறுத்தவா
அடியெதுத்து நடந்துவா

தனிப்பாதை தேவாலயம்
தரை மட்டமாக்க
தமிழர் மறமே
தயங்காமல் நீ வா

பேச்சு

2008-10-19T10:44:00.000-07:00

பார்க்கும் இடமெல்லாம்
பரபரப்பாய் பலவிதப்
பேச்சுக்கள்.
யார்க்கும் புரியாமல்
எதையோ நீட்டி முழக்கி
எறியப்படும் சொற்கள்.
வேர்க்க விருவிருக்க
கேட்பவர் வேதனையில்
துடிக்க பேருரைகள்.
மேடை விட்டிறங்கியதும்
மேல் துண்டாய் தூக்கி
எறியப்படும் கொள்கைகள்.
காற்றில்
காணாமல் போன
வாக்குறுதிகள்.
நாக்கு வங்கியின்
வாக்கு மட்டுமே
மூலதனம்.
சீக்கு சொற்களால்
சீழ் பிடித்துப் போன
செவ்வாய்.
நீக்கு போக்குகள்
நித்தமும் தேடும்
நிதர்சணம்
மேலும் கீழும்
மேனி அசைந்து
வாழும் கலை.

மனிதம்

2008-10-19T10:09:00.000-07:00

இடம் பிடிக்கும் ஆசையில்
இரத்த வெள்ளத்தில்
யாருமற்று.
உலகத்தின்
எல்லா பக்கங்களிலும்
கலகத்தின் சுவடுகள்.
ஈராக்கில்
இனப்படுகொலை
ஈவு இரக்கமின்றி.
தன் குடிமகன்
கொல்லப்பட்டால்
தவிக்கும் மேலைநாட்டவர்.
சொந்த மக்களை
அகதிகளாக்கும்
இலங்கை பேரினவாதம்.
தன் நாட்டு
மீனவர்களையே
தமிழர்களாய் பார்க்கும் இந்தியா.
இந்தியப் பெருங்கடலை
வல்லாண்மை செய்ய ஆயுதம்
வழங்கும் இந்தியா
உலக அமைதியை
உரக்க பேசியே
உயிரைக் குடிக்கும் அமெரிக்கா.
தமிழர் கறி கேட்கும்
தென்னிலங்கை
பௌத்தம்.
சதை பிய்த்து
குருதி குடித்து
சந்தியில் மனிதம்.
ஆளுக்காள் அரசியல்
பண்ண இடந்தரும்
அட்சயபாத்திரம் மனிதம்.

கவிமதி: இது எரிமலை பசி.

2008-09-29T10:27:00.000-07:00

கவிமதி: இது எரிமலை பசி.

பாலா கவிதைகள்

2008-07-16T09:42:00.000-07:00

பாலா கவிதைகள்

விண்ணில் பறக்குது விலைவாசி

2008-06-15T07:53:00.000-07:00

விண்ணில் பறக்குது விலைவாசி
வீனாய் எதற்கிந்த அரசாட்சி
கண்ணில் தெரியுது சுடுகாடு - ஆட்சிக்
கட்டிலை விட்டு நீயோடு

கச்சா எண்ணெயின் விலையேற்றம்
காரணமா மக்கள் கழுத்தறுக்க
பிச்சைக்காரராய் எங்களை மாற்றும்
பிணந்திண்ணிக் கழுகாய் ஆனதுமேன்

ஆயிரம் கோடி மானியங்கள்
அம்பானி சொத்தை அதிமாக்க
வாய்வீரம் பேசும் சிதம்பரங்கள்
வட்டி முதலாளிகள் கைக்கூலி

அட்டையென உறிஞ்சும் கடனட்டை-நாட்டை
அடிமையாக்கும் உலக வங்கி
பெட்டையெனப் புலம்பும் ஆட்சியாளர்
பெருத்த ஜனத்திரள் தேசமிது

உள்நாட்டு எண்ணெய்வளம் தனியாருக்கு
உலகச் சந்தையில் கையேந்தல் பன்னாட்டு வணிகருக்கு கால்பிடிக்கும்
பச்சோந்தி அரசியல் வாணர்கள்

நச்சுக் கொள்கைகள் பின்னோட்டம்
நாட்டை அடிமையாக்கும் முன்னோட்டம்
மெச்சும் அமெரிக்க நாயெனவே
மேனிக் குனிந்து தப்பாட்டம்

அப்பாவிகள் அல்ல எம்மக்கள்
அடுத்த தேர்தல் அவர்கையில்
தப்பைத் திருத்திக் கொள்ளுங்கள்
தானே விலையைக் குறையுங்கள்

தவறினால் தண்டனை நிச்சயம்
தலைகீழ் மாற்றங்கள் நிச்சயம்
பவரினை மறந்து துரிதமாய்
பொருட்களின் விலைகளைக் குறைத்திடுக

கட்டாந்தரை

2008-03-25T09:31:00.000-07:00

இந்த பூமியில்
ஆகப் பெருமளவில்
வாழும் உயிர்கள்.

ஒன்றைச் சார்ந்தே
மற்றதின் இயக்கம்,
வாழ்க்கை.

கோள வடிவத்தின்
மூலம்
சுழற்சி

சுழற்சி முடிவில்
முழுமையடையும்
படைப்பு

படைப்பு
இயற்கையின்
பரிசு

பச்சைத் தாவர
உயிர்த்துடிப்பில்
பசி விரட்டு

தாவரம் விலங்கு
மனிதன் தொடரும்
உணவு உறவு

விளைந்த நிலம்
வெடித்து இருகி
கட்டாந் தரையாய்

காதல் துளிப்பா

2008-01-23T10:09:00.000-08:00

மல்லிகை மணம்
அறையெங்கும்
மாற்றலானப் பெண் ஊழியர்

வருகையின் விளம்பரம்
வருடும் இசையொலி
கொலுசு

வளைவுகளில்முந்தாதீர்
எச்சரித்தும் முந்தியது
முந்தானை

வேகத் தடை
விழுந்து எழுந்து விரல்கள்
இடுப்பு மடிப்புகள்

நிலவு முகத்தில்
மின்னிய விண்மீன்
மூக்குத்தி

காதுகளில்
முழுநிலவு
வளையம்

காமராசர்

2008-01-23T09:16:00.000-08:00

விருது நகரில் பிறந்தவராம்
விடுதலைக்காக உழைத்தவராம்
உருவில் கருமை நிறத்தவராம்
உண்மையில் வெள்ளை மனத்தவராம்

நெடியத் தோற்றம் கொண்டவராம்
நேர்படப் பேசும் குணத்தவராம்
கொடிய அறியாமை இருளகற்ற
கொள்கை வகுத்து உழைத்தவராம்

மதிய உணவு அளித்தவராம்
மாணவர் கற்றிட அழைத்தவராம்
புதிய அறிவு வெளிச்சத்தை
புகுத்தி தமிழகம் காத்தவராம்

ஐந்தாண்டுத் திட்டங்கள் கண்டவராம்
அணைகள் கட்டி முடித்தவராம்
பைந்தமிழ் நாட்டை பசுமையாக்க
பாடுகள் பட்டே உழைத்தவராம்

பகுத்தறிவுப் பகலவன் பெரியாரால்
பச்சைத் தமிழரெனப் பட்டவராம்
வகுத்தப் பாதையில் வழுவாமல்
வாழ்ந்து காட்டிய காமராசர்

இளைஞர் கண்ணில்

2007-12-26T09:13:00.000-08:00

பிரிவினைகள் குவிந்த மண்ணில்
பேதங்கள் நிறைந்த மண்ணில்
நரித்தனங்கள் நடக்கும் மண்ணில்
நாளைய கனவு எண்ணி
நடைபோடும் இளைஞர் கண்ணில்
நம்பிக்கைத் துளியும் இல்லை
கடைவிரித்தக் கவிஞர் சொல்லைக்
கிஞ்சித்தும் கருத வில்லை

நாட்டினிலே நடக்கும் காட்சி
நன்றாக உற்று நோக்கல்
ஏட்டினிலே எழுதும் செய்தி
எடைபோட்டுப் பார்க்கும் பண்பும்
எள்ளலவும் அவருக் கில்லை
ஏன்தானோ தெரிய வில்லை
கள்குடித்தக் கயவர் போலேக்
கிடக்கின்றார் மயங்கி வீணே

வட்ட நிலவினில்

2007-12-26T08:51:00.000-08:00

கெட்ட நண்பரை விட்டுத் தொலைத்திடு
கேடுகள் சூழ்ந்திடும் கீழ்மை சேர்ந்திடும்
நட்ட கல்லையே நம்புதல் தவிர்த்திடு
நாளும் கிழமையும் நலிந்தோர்க் கில்லையே

வட்ட நிலவினில் வந்திடும் விடுதிகள்
வளரும் அறிவியல் தொழில் நுட்பத்தாலே
தொட்டச் செயலினை தொடர்ந்து முடித்திடு

தோல்விகள் இல்லையே தொடரும் வெற்றிகள்

பாரதியின் கனவுகள்

2007-12-26T08:12:00.000-08:00

காணிநிலம் வேண்டினாய் பாரதி-இன்று
காலிமனைப் பகல்கனவு பாரதி
கவிதை உமக்குத் தொழில் பாரதி-இங்கு
கவிஞருக்குக் கனவேத் தொல்லை பாரதி

குயில்தோப்புக் கவிதைக் களம் பாரதி-இன்று
குடியிருப்பு மனைகளாச்சு பாரதி
மண்விடுதலை வேண்டினாய் பாரதி-பாரதம்
மறுகாலணியம் ஆகுதையா பாரதி

சாதி மறுத்தவன்நீ பாரதி-இன்று
சங்கங்கள் சாதிபேரால் பாரதி
பள்ளியெழுச்சிப் பாடினாய் பாரதி-தமிழர்
தாலாட்டென்று தூங்கினார் பாரதி

பெண்கல்வி வேண்டினாய் பாரதி-மகளிர்
பெண்மொழி பேசுகிறார் பாரதி
காக்கையையும் அடக்கம் செய்தாய் பாரதி-இன்று
காக்கும்கைகள் குழிபறிக்குது பாரதி

மறுகாலணியம்

2007-12-17T08:55:00.000-08:00

கூடையில கருவாடு
குடத்தில நீர்மோரு
அடையோடு அத்தணையும்
அம்பானி விக்குறானே

அரைகீரை சிறுகீரை
அதிரசம் ஆப்பம்
விரைவு உணவோட
விக்குறானே அம்பானி

பொட்டிக்கடை சாமானெல்லாம்
பிளாஸ்டிக் பைக்குள்ள
பொட்டலமா விக்குறான்
பொழப்பக் கெடுத்துப்புட்டான்

அன்றாடம் புதுசாக
அறுத்துவரும் காய்கறியை
அடைச்சுக் குளிரறையில்
அதிகநாள் வைக்குறானே

பிரஷூ பிரஷூன்னு
பித்துபிடித்த சனம்
வரிசையில நிக்குறாங்க
வாங்கத் துடிக்கிறாங்க

சிறுவணிகர் எல்லோரும்
சீக்கிரமா செத்தொழிய
பெருமுதலாளி எல்லாம்
பேசிப்புட்டான் ஒப்பந்தத்த

அம்பானி அடிமையாக
ஆகிப்புட்டான் ஆளுரவன்
கொம்பா நீங்களென
வம்புக்கு வாரானே

நாட்டுமக்கள் எல்லோரும்
நல்லாப் புரிஞ்சிக்கணும்
ஓட்டுப்போட்டு வந்தவங்க
ஒழுக்கத்தத் தெரிஞ்சிக்கணும்

பன்னாட்டு வணிகர்களை
பாரத தேசத்துல
அண்டவிடக் கூடாது
அடித்துத் துரத்திடணும்

திண்ணையிலப் படுக்கவிட்டால்
திருடிடுவான் வீட்டையெல்லாம்
அன்னைபூமி அத்தனையும்
அவஞ்சொந்தம் ஆக்கிடுவான்

மக்களே சேர்ந்துடுங்க
மண்ணைக் காப்பாத்த
செக்கிழுத்த சுதந்திரத்தைச்
சேர்ந்துப் பாதுகாக்க

அறுபதாண்டு விடுதலையை
அடகுவைக்கும் அரசுகளை
எறிந்திடுவோம் வெகுதூரம்
எதிர்த்திடுவோம் மறுகாலணியம்

நமக்கான அரசை வெல்லு

2007-12-16T07:56:00.000-08:00

இலக்கியனார் எல்லாம் இன்று
இலக்கின்றி எங்கும் சென்று
வளர்க்கின்றார் வயிறு என்று
வசையடிகள் வழங்கல் நன்றோ?

நிலைக்கின்றப் பாடல் யாத்து
நெஞ்சினையே நேராய் வைத்துக்
கலைக்காண மதிப்பைக் கூட்டிக்
கவிஞரெலாம் வாழ்தல் வேண்டும்

அவலங்கள் கண்டும் கேட்டும்
அடுத்தவர்மேல் குறைகள் போட்டும்
தவளைபோல் இருத்தல் நன்றோ
அறிந்திடுவீர் புலவர் மக்காள்

கொடுமைகள் தீர்க்கப் பாடு
கொள்கைகள் முழங்கிக் கூவு
நடுவுநிலை நீயும் தள்ளு
நமக்காண அரசை வெல்லு

சுடுகாடாச்சே

2007-12-16T07:21:00.000-08:00

கல்மரமாய் வயல்கள் ஆகக்
கழனிகளும் காய்ந்தேப் போக
நெல்மணிகள் விளைந்த மண்ணில்
நிழலுக்கும் மரங்கள் இன்றிப்
புல்முளைக்கா வண்ணம் பூமிப்
புழுதியாக ஆன திங்கே
புல்லினமும் விலங்கும் கூடப்
புறப்பட்டுப் போன தெங்கோ?

உருப்படுமோ இந்த ஞாலம்?

2007-12-16T06:46:00.000-08:00

திங்களிலும் மனிதர் சென்றார்
திசையெட்டும் பறந்து சென்றார்
எங்கெங்கு வளங்கள் உண்டோ
எல்லாமும் கவர்ந்துக் கொண்டார்

தங்கத்தை வெட்டி னார்கள்
தண்ணீரை உறிஞ்சி னார்கள்
சிங்கத்தைக் கூட்டில் வைத்தார்
சிறுவிலங்கை விரட்டி விட்டார்

பசுமைசூழ் காட்டை யெல்லாம்
பாலையாய் ஆக்கி விட்டார்
விசும்பினிலும் ஓட்டை யாகும்
வேண்டாத வாயுச் சேர்த்தார்

இயற்கையை அழித்து விட்டால்
எப்படித்தான் வாழ்வோம் என்ற
உயரறிவை இழந்து நின்றார்
உருப்படுமோ இந்த ஞாலம்?

ஆறு எழுந்தால்....

2007-12-15T23:47:00.000-08:00

ஆறு எழுந்தால் அருவி யாகும்
அடிமை எழுந்தால் ஆட்சி மாறும்
சேறு வறண்டால் செந்நெல் மறையும்
சாதி மறைந்தால் சமத்துவம் விளையும்

நாறு சேர்ந்தால் மலர் மாலையாகும்
நன்றி மறந்தால் நிலமை தாழும்
வீறு குறைந்தால் கவிதை வீழும்
வேரைத் தொழுதால் வெற்றிக் குவியும்

போரை மறந்தால் புத்தம் தழைக்கும்
புவியைக் காத்தால் சந்ததி வாழ்த்தும்
நீரைச் சேர்த்தால் நிலவும் பசுமை
நிறைவாய்க் கற்றால் நீங்கும் கீழ்மை

தலைப்பாகை

2007-12-14T09:29:00.000-08:00

வெய்யிலில் தலையின்
வெக்கைத் தணிக்கும்
தலைக்கவசம்

பண்பாட்டின் அடையாளமாய்
பல இனங்களுக்குப்
பதாகை

வேலை நேரத்தில்
வேட்டியை மடித்துத்
தலைப்பாகைக்கட்டினால்
உற்சாகம்

உழைத்து வியர்த்த
உடலைத் துடைக்க
உடனடித் தோழன்

குளிரில் உடலைக்
காத்து நிற்கும்
கைகள்

நீட்டிப்படுக்கப் பாயாய்
நீளும் தரையில்
துண்டாய்

அந்தி வேளையில்
அப்பா அவிழ்த்தால்
விரும்பியத் திண்பண்டங்களின்
இருப்பிடமாய்த் தலைப்பாகை

அன்பெனும் மழையினிலே

2007-12-13T09:49:00.000-08:00

அன்பெனும் மழையினிலே
அனைவரும் நனைந்திடுவோம்
வன்மங்கள் மறந்திடுவோம்
வாழ்க்கையை வாழ்ந்திடுவோம்

என்புகள் தோலுமான
யாக்கையும் நிலையல்ல
பண்புகள் பண்பாடுகள்
பாதுகாத்துப் போற்றிடுவோம்

சொந்தங்கள் மட்டுமின்றி
சூழும் சமூகத்தினை
சொந்தமாய் நினைத்திடுவோம்
சொர்க்கமாகும் வாழ்க்கையுமே

மண்தரை சேரும்நீராய்
ஒன்றியே வாழந்திடுவோம்
விண்வரை வளரும்புகழ்
வீரமே அன்புதானே

இன்றைய துளிப்பா

2007-11-13T06:33:00.000-08:00

சம்புகன் தவம்
இராமனின் வரம்
சிரச்சேதம்

குறையும் தூரம்
பெருகும் இடைவெளி
நகர மயம்

மேலும் சில ஹைக்கூக்கள்

2007-10-25T04:57:00.000-07:00

அடுக்கடுக்காய்ப் புத்தகம்
அழகழகாய் அட்டைப்படம்
படிக்காத அலமாரி

உயர்ந்து நிற்கும் கட்டிடம்
ஒழுகும் குடிசையில்
கொத்தனார்

தலையில் முக்காடு
தரையில் பூக்காடு
மார்கழி

ஹைக்கூ

2007-10-25T04:30:00.000-07:00

வணக்கம்
என்னுடைய முதல் படைப்பை வெளியிடுகிறேன்.
இன்றுமுதல் இணைய வலைப்பதிவில் நானும்

அதிர்ச்சியில் ஆயா
அரைக்கீரை விற்கிறான்
அம்பானி