Saturday, March 9, 2013

அடுப்பூதும் பெண்களுக்குப் படிப்பெதற்கு?

தலைப்பைக் கண்டதுமே தடுமாறிப் போனேன்யான்
நிலையின்றை அறியாமல் கலாவிசுக் கொடுப்பாரா?
அலையலையாய் எண்ணங்கள் ஆடிநின்ற போதினிலும்
தலைநகரில் நடந்தகதை தமிழ்நாட்டின் இற்றைநிலை

எண்ணுகின்ற வேளையிலே எள்ளலவும் மாற்றமில்லை
மண்ணுலகில் மகளிரையே உயிராக மதிக்கவில்லை
பண்ணுகின்றார் பணமவரைப் பகடைக் காயாக்கி
திண்ணுகின்றார் அவருழைப்பில் தினமும் அடிமையாக்கி

அத்தனைத் துறைகளிலும் அதிரடியாய் மாற்றங்கள்
இத்தரையில் பெண்ணின்றி ஏதினிமேல் ஏற்றங்கள்
முத்திரைப் பதித்தப்பெண்  முகவரிகள் ஏராளம்
நித்தரை இழந்தவர்கள் உழைப்போ தாராளம்

கத்துங் குயிலாக களப்போர் மங்கையாக
எத்திக்கும் சென்றுழைக்கும் எழுச்சி மகளிராக
வித்தக அரசியலில் வீறுநடை தலைவியாக
நித்தமும் காணுகின்றோம் நிதர்சனம் மறக்கின்றோம்

களர்நிலமாய் குடும்பங்கள் மலடாகிப் போகாமல்
தளர்நடையில் குமுகாயம் தடைபட்டு நிற்காமல்
வளர்பாதை செல்வதற்கு வேண்டுமே பெண்கல்வி
களக்கவி பாவேந்தன் கலகக் குரலறிவோம்

பணமீட்டும் பெண்பார்த்தே மணமுடிக்கத் துடிக்கின்றாய்
மணப்பொருத்தம் பார்க்காமல் பணம்பங்களா கேட்கின்றாய்
இனம்வேறு என்றாலும் இருக்கும் சொத்தை எண்ணுகிறாய்
கணமேணும் காசொழிய கருத்தினில் ஏதுமுண்டா?

அடுப்பூதும் பெண்களுக்குப் படிப்பெதற்கு?
ஆணவத்தின் வினாவிடுத்து அறிவுபெறு!
துடுப்பாக வாழ்க்கையினைக் கடப்பதற்கு
துணையாகும் பெண்கல்வி தூய்மையாகு!



Friday, March 8, 2013

மலரல்ல நாங்கள் இனி

வன்புணர்ச்சி வெறியாட்டம்
வழக்காகிப் போனதிங்கே
பெண்ணுரிமை முழக்கமெல்லாம்
போலியாகிப் போனதிங்கே

கண்ணில்லாப் பெண்டிரையும்
கைத்தவழும் குழவியையும்
தன்னந்தனியாய் வாழும்
தளர்ந்த முதியவளையும்

எண்ணிப் பார்க்க முடியாதபடி
எத்தனையோக் கொடுமை செய்து
வன்புணர்ச்சி செய்கின்ற
வல்லூறு கூட்டமிங்கே

பெண்களுக்கு வேண்டும் உடை
பேடிகளும் முன் மொழிந்து
ஆண்களின் வக்கிரத்தை
ஆதரிக்கும் அசிங்கமிங்கே

வசதியுள்ள பெண்ணென்றால்
வலுக்கின்ற போராட்டம்
வசதியற்ற உயிரென்றால்
வாய் மூடி மௌனிவேடம்

மன நோயாளிகளின்
மந்தையாகிப் போன நாட்டில்
இனப்பற்றும் மொழிப்பற்றும்
இல்லாத தேசத்தில்

மடிசுமந்த தாயென்றும்
மனம் கவர்ந்த மங்கையென்றும்
அடிதொடரும் தங்கையென்றும்
அரக்கர்கள் நினைப்பதில்லை

உரிமைகளைப் பெறுவதற்கு
உரத்த குரல் கொடுக்கும் நாளில்
எரியீட்டி ஏந்தி மகளிர்
எல்லோரும் சேர்ந்திடுவோம்

உறுதிகொண்ட நெஞ்சோடும்
உண்மை அன்பு வீரத்தோடும்
சிறிதளவும் அச்சமின்றி
சினம் சுமந்து எழுந்திடுவீர்

மகளிர் நாள் செய்தியாக
மக்களுக்கு சொல்லி வைப்போம்
மலரல்ல நாங்கள் இனி
மருந்துவெடி குண்டென்று

வறியராய் இருந்தாலும்
வரலாற்றைப் படைத்திடுவோம்
அறியாமைத் தீயிலிட்டு
அடைந்திடுவோம் பிறப்புரிமை

வன்மம் கொண்ட விழிகளையே
வாருங்கள் பிய்த்தெறிவோம்
நன்மனத்தால் நமைநோக்கும்
நடப்பினையே நாம் படைப்போம்