ஆயிரம் ஆண்டு அனுபவப் பகிர்வு
அடைந்திடும் கூட்டுக் குடும்பம்
தாயும் தந்தையும் அண்ணன் தம்பியும்
தவழ்ந்திடும் கூட்டுக் குடும்பம்
தானுண்டு தன்பிள்ளை பெண்டென்றால்
தழைக்குமா சமுதாயம் நண்பா
ஆண்பெண் தனியாய் இருந்தால்
அடுக்குமா சொல்வாய் நண்பா
சிறுசிறு பிணக்கால் சீக்கிரம் பிரியும்
சிக்கல் நிறைந்தது தனிக்குடும்பம்
பெரிய சண்டையும் பேசித் தீர்த்திடும்
பெரியோர் கூட்டுக் குடும்பம்
தனியாய் இருந்து தறிகெட்டு நடக்க
தாராளம் தனிக் குடும்பம்
அணியாய் இருக்கும் அத்து மீறாது
அழகிய கூட்டுக் குடும்பம்
மனச் சிதைவாலே மணவிலக்காகும்
மண்ணில் தனிக் குடும்பம்
மனத்தை மாற்றி மாண்புகள் போற்றும்
மகத்தானக் கூட்டுக் குடும்பம்
கானல் நீராய் தோன்றும் மகிழ்ச்சி
காண்பீர் தனிக் குடும்பம்
வானை மிஞ்சும் வாஞ்சை தேக்கும்
வளமார் கூட்டுக் குடும்பம்
